તમારા માટે, તમારી સાથે, સતત…

સત્યેન શાહની રોજનીશીની વાત અટલ સમક્ષ સાવિત્રીએ જાહેર કરી દીધી

એકાએક સાવિત્રીને કહ્યા વગર સત્યેનનું બહાર જવું બધાંને અજુગતું લાગ્યું.

0 142

નવલકથા – સંગીતા-સુધીર –પ્રકરણ ઃ ૦૮

અને સાવિત્રીએ આવેશમાં સત્યેન શાહની રોજનીશીની વાત અટલ સમક્ષ જાહેર કરી દીધી

કાંતિલાલ અને સત્યેન શાહે તેમની બધી જ કંપનીઓની ઑફિસો મુંબઈના બાન્દ્રા-કુર્લા કૉમ્પ્લેક્સની બાજુમાં આવેલા એસ.એસ.હાઉસનામના આઠ માળના બિલ્ડિંગમાં ખસેડી હતી. બિલ્ડિંગના ટોચના આઠમા ફ્લોર પર સત્યેન શાહની ભવ્ય ઑફિસ આવેલી હતી. બિલ્ડિંગની ટૅરેસ પર હેલિપેડ ઉપરાંત અન્ય ફ્લોર્સ પર વિશાળ કૉન્ફરન્સ રૃમ, કંપનીઓની ઑફિસો, કૅન્ટીન, કાર પાર્કિંગ, સિક્યૉરિટી ગાડ્ર્સની ઑફિસ તેમજ રહેણાક, રિસેપ્શન એરિયા, ગાર્ડન સહિતની તમામ સુવિધાઓ મોજૂદ હતી. આ તરફ સત્યેન શાહ સાથે નક્કી થયેલી મુલાકાતના સમય કરતાં થોડા વહેલા પહોંચેલા રિપોર્ટર અટલને એસ.એસ.હાઉસના કૉન્ફરન્સ રૃમમાં અન્ય ન્યૂઝ પેપર્સના પંદર-વીસ રિપોર્ટરો તેમજ ફોટોગ્રાફર્સને પણ આવેલા જોઈને આશ્ચર્ય થયું. થોડીવારમાં રિપોર્ટર અચલા પણ ત્યાં પહોંચતાં અટલને મોટો આંચકો લાગ્યો. અટલ અને અચલાની ગણના ટોચના રિપોર્ટરો તરીકે થતી હતી. સત્યના આગ્રહી એવા આ બંને રિપોર્ટરો વચ્ચે પ્રોફેશનલ રાઇવલરી અને એકબીજા પ્રત્યે ઈર્ષાભાવ પણ હતા. અટલ સત્યેન શાહનો સ્વતંત્ર ઇન્ટરવ્યૂ કરવા માગતો હતો. બીજી તરફ કૉન્ફરન્સ રૃમમાં દાખલ થતી અચલા પણ અટલને જોઈને અટકી ગઈ. જોકે, અચલાને બધા રિપોર્ટરો પ્રેસ કૉન્ફરન્સના સમય કરતાં કલાક વહેલા કેમ આવ્યા તેનું આશ્ચર્ય હતું. કેમ કે તેનો પણ સત્યેન શાહનો પર્સનલ ઇન્ટરવ્યૂ કરવાનો ઇરાદો હતો. દરમિયાન અટલ અચાનક પ્રેસ કૉન્ફરન્સ રૃમમાંથી બહાર નીકળી સત્યેન શાહને મળવાના ઇરાદે તેમના મધુરિમાબંગલે જવા નીકળી ગયો. મધુરિમાપહોંચેલા અટલને સત્યેન શાહ એકલા મળશે કે કેમ તેની શંકા હતી. તે બંગલામાં સીધેસીધો જતાં ખચકાતો હતો. તે આ અસમંજસમાં હતો ત્યાં જ બસો-ત્રણસો સ્ત્રી-પુરુષોનું ટોળું હાથમાં બેનર્સ લઈને સત્યેન શાહ વિરુદ્ધ નારા લગાવતું લગાવતું મધુરિમાબંગલાની બહાર આવીને ઊભું રહી ગયું. સિંધી સમાજના એ લોકો સમાજસેવિકા રમણી અદનાનીની તરફેણમાં ઊમટી પડ્યા હતા. દરમિયાન બંગલાનો પ્રવેશદ્વાર ખૂલ્યો. તેમાંથી સિક્યૉરિટી ગાડ્ર્સ અને ડ્રાઇવર બહાર આવ્યા અને ટોળાને બંગલામાં પ્રવેશતું અટકાવવા આગળ વધ્યા. આથી હોહા મચી ગઈ. આ તકનો લાભ લઈને અટલ બંગલામાં ઘૂસી ગયો. બંગલાની અંદરની જાહોજલાલી જોઈને અટલ આભો બની ગયો. પ્રવેશદ્વારમાંથી બંગલાની અંદર જવા તેણે પગ ઉપાડ્યા ત્યાં જ સામેથી સત્યેન શાહનાં પત્ની સાવિત્રી બહાર આવ્યાં. સાવિત્રીને અટલ બહારના ટોળામાંનો માણસ લાગ્યો. આવેશમાં આવીને તેમણે અટલ સમક્ષ સત્યેન શાહની રોજનીશીની વાત જાહેર કરી દીધી. અટલે પોતાની ઓળખ આપી અને રોજનીશી વિશે પૃચ્છા કરી સત્યેન શાહને અંગત રીતે મળવાનો ઇરાદો જાહેર કર્યાે, પરંતુ સાવિત્રીએ તેને બંગલાની બહાર નીકળી જવા સાફ શબ્દોમાં જણાવી દીધું.        

હવે આગળ વાંચો…

‘યુ પ્લીઝ, ગેટ આઉટ…’

સાવિત્રીએ ઉચ્ચારેલ શબ્દ ‘ગેટ આઉટ’ અટલને જચ્યા નહીં. સામાન્ય સંજોગો હોત તો જરૃરથી એને ઉદ્દેશીને કહેવામાં આવેલ આ અપમાનજનક શબ્દોનો એ વિરોધ કરત, પણ અત્યારના તો એણે પોતે જ ખોટું

કૃત્ય આચર્યું હતું. વણબોલાવેલ એ સત્યેન શાહના બંગલામાં પ્રવેશ્યો હતો. આથી સાવિત્રી એને બહાર જવાનું કહે અને એમ ન કરતાં સાવિત્રીએ વાતવાતમાં જેનો ઉલ્લેખ કર્યો હતો એ સત્યેન શાહની રોજનીશી વિશે એણે સામો સવાલ કર્યો હતો. સ્વાભાવિક છે કે સાવિત્રી એને બહાર જવાનું કહેવા માટે સખત શબ્દો વાપરે.

બહાર જે ટોળું ભેગું થયું હતું એનો કોલાહલ હવે બંગલાની અંદર સંભળાઈ રહ્યો હતો. બંગલાની અંદરથી પણ બે-ચાર વ્યક્તિઓ બહાર આવી રહી હોય એવું અંદરથી આવતાં પગલાંના અવાજ ઉપરથી અટલે અનુમાન કર્યું. ‘હવે અહીંથી બહાર જવામાં જ સલામતી છે’ એવું વિચારી અટલ બંગલાની બહાર નીકળ્યો.

‘સત્યેન શાહ મુર્દાબાદ…’

‘સત્યેન શાહ હાય હાય…’

‘સત્યેન શાહની ધરપકડ કરો, જાતીય શોષણ અટકાવો.’

આવા આવા પોકારો ટોળાનાં સ્ત્રી-પુરુષો અને ખાસ કરીને સ્ત્રીઓ હવે જોરશોરથી કરવા લાગી હતી. એવું જણાતું હતું કે સત્યેન શાહના સિક્યૉરિટી ગાડ્ર્સ અને ડ્રાઇવરો એ ટોળાંને અટકાવી શકે એમ નહોતા. તેઓ ફૂટપાથ અને રસ્તા ઉપર ઊભાં રહીને પોકારો કરતાં હતાં.

વરલી સી ફેસના એ રસ્તા ઉપર સામાન્ય રીતે પગે ચાલતા રાહદારીઓ નથી હોતા. સવારના તેમ જ સાંજના દરિયાની નજીક આવેલ ફૂટપાથ ઉપર લોકો મોર્નિંગ અને ઇવનિંગ વૉક લેતા હોય છે. અન્યથા એકલ-દોકલ રાહદારી સિવાય બીજું કોઈ એ રસ્તા ઉપર ચાલતું નથી હોતું. ફક્ત મોટરો જ આવન-જાવન કરતી હોય છે. આ ટોળાંને જોઈને મોટરિસ્ટો એમની મોટરની ઝડપ ઘટાડતા અને કુતૂહલથી શું થઈ રહ્યું છે? આ ટોળું શા માટે ભેગું થયું છે? કોની વિરુદ્ધ નારા લગાડી રહ્યાં છે? આ બધું જોતા હતા. બે-પાંચ ગાડીવાળા જેમને ઉતાવળ ન હતી એમણે એમની ગાડી મધુરિમાની આસપાસ ઊભી રાખી હતી. થોડા ઘણા રડ્યાખડ્યા લોકો પણ કુતૂહલવશાત્ ત્યાં ઊભા રહી ગયા હતા. બાજુના બંગલાના રખેવાળો અવાજો સાંભળીને ‘શું છે?’ એ જોવા એમના બંગલામાંથી બહાર આવીને મધુરિમા આગળ આવીને ઊભા રહી ગયા હતા.

‘આવા વાતાવરણમાં સત્યેન શાહ એના બંગલામાંથી બહાર કેમ નીકળશે? જો એ બહાર નીકળશે તો આ ટોળું નક્કી એની કારને વીંટળાઈ વળશે અને જવા નહીં દે. આવા સંજોગોમાં સત્યેન શાહ એની ઑફિસમાં બોલાવેલ પ્રેસ કૉન્ફરન્સમાં હાજર કેવી રીતે રહી શકશે.’

અટલના મનમાં આવા આવા સવાલો ઊભા થયા. એ દ્વિધામાં પડી ગયો.

‘સત્યેન શાહની ઑફિસમાં જાઉં અને બીજા રિપોર્ટરો જોડે પ્રેસ કૉન્ફરન્સ માટે સત્યેન શાહ આવે એની વાટ જોઉં? કે પછી અહીં જ ઊભો રહું અને સત્યેન શાહ જેવા બહાર આવે કે ટોળાંમાંથી માર્ગ કાઢીને એમને મળું?’

અટલને એનો બીજો વિચાર અસંભવિત લાગ્યો.

‘આવી ધાંધલધમાલ છે એટલે સત્યેન શાહ હમણા તો બંગલાની બહાર નહીં નીકળે. એ જરૃરથી પોલીસને બોલાવશે. ટોળાંને દૂર કરાવશે અને પછી ઑફિસે જવા નીકળશે. પ્રેસ કૉન્ફરન્સનો સમય થોડો વધુ લંબાવશે. આ બધામાં સત્યેન શાહને મળવું મુશ્કેલ હશે.’

‘જો પ્રેસ કૉન્ફરન્સમાં જઈશ તો જરૃરથી સત્યેન શાહને મળી શકીશ.’

દસ-પંદર મિનિટ સુધી સત્યેન શાહના બંગલાની બહાર ઊભા ઊભા અટલે આવું વિચાર્યું. આખરે એણે પાર્ક કરેલી હાડર્લી ડેવિડસન પાસે ગયો. મોટરબાઈક ઉપર બેઠો અને કિક મારીને એ સ્ટાર્ટ કરી. એટલામાં જ પોલીસ વૅનની સાઇરન સંભળાઈ. મનમાં ને મનમાં અટલ મલકી ઊઠ્યો. આ સિંધીઓનાં ટોળાંને હવે પોલીસો મધુરિમા આગળથી દૂર કરશે અને સત્યેન શાહ એમની બુલેટપ્રૂફ મર્સિડીઝમાં બેસીને ઝડપથી એમની ઑફિસે પહોંચી જશે. આવું વિચારતા અટલે એની બાઈકને એસ.એસ. હાઉસ તરફ ભગાવી. સી લિંક ઉપરથી એ જઈ શકે એમ નહોતો. મોટરમાં સી લિંક ઉપરથી બાન્દ્રા-કુર્લા કૉમ્પ્લેક્સમાં સત્યેન શાહ એના કરતાં ઝડપથી પહોંચી શકશે એ વિચારે એણે એની બાઈકની સ્પીડ થોડી વધારી.

* * *

એસ.એસ. હાઉસના સાતમા માળે અટલ જ્યારે પાછો ફર્યો ત્યારે સાડા દસ વાગવા જ આવ્યા હતા. ફ્રેન્ચ પિન્ક શૅમ્પેન પીતાં પીતાં બ્રેકફાસ્ટ કરીને સંતુષ્ટ પામેલા રિપોર્ટરો હવે કૉન્ફરન્સ રૃમના આંખના આકારના જાયન્ટ ટેબલની આજુબાજુ ગોઠવાઈને બેસી ગયા હતા. અચલા ઉપરાંત બીજી પણ થોડી લેડી રિપોર્ટરો એ બધામાં હતી. સૌ અંદરોઅંદર વાતચીત કરી રહ્યાં હતાં. વિષય બધાંનો એક જ હતો, સત્યેન શાહ જેવા પ્રતિષ્ઠિત બિઝનેસમેને આવાં પાંચ-પાંચ શરમજનક જાતીય શોષણનાં કૃત્યો કેમ આચર્યાં હશે!

‘અરે, પાંચ કૃત્યો તો આપણી જાણમાં આવ્યાં છે, કારણ કે એ સ્ત્રીઓએ મોડે મોડે પણ એમની ઉપર થયેલ અત્યાચારો જાહેર કર્યાં. એ સિવાય પણ મિસ્ટર સત્યેન શાહે કંઈકેટલાંય આવાં કૃત્યો આચર્યાં હશે.’ એક સ્ત્રી રિપોર્ટર બોલી.

‘તમે આવું અનુમાન શા ઉપરથી કરો છો?’ સ્ત્રીના કહેવાનો વિરોધ કરવો જોઈએ એવું માનતા એક પુરુષ રિપોર્ટરે સવાલ કર્યો.

‘હા, હા, મને તો લાગે છે કે આ બધા આક્ષેપો ખોટા છે. સત્યેન શાહ એક સજ્જન પુરુષ છે.’ એક બીજા પુરુષ રિપોર્ટરે એના ભાઈબંધને સપોર્ટ આપ્યો.

‘મને તો એમ લાગે છે કે આ કોઈનું કાવતરું છે.’

‘નક્કી બિઝનેસ રાઈવલરીને કારણે જ આ આક્ષેપો થયા છે.’

‘તો પછી સત્યેન શાહ આટલા દિવસો ચૂપ કેમ રહ્યા?’

‘આક્ષેપો ખોટા છે એ માટે પુરાવા તો આપવા જોઈએ ને? એ ભેગા કરતા હશે.’

‘એની શું જરૃર છે? આક્ષેપો કરનારાઓએ ક્યાં કોઈ પુરાવાઓ આપ્યા છે.’

‘નક્કી, આ પાંચેય સ્ત્રીઓએ પ્રસિદ્ધિ ખાતર આવા આક્ષેપો કર્યા છે.’

‘કાયદામાં પણ કોઈએ કંઈ ગુનો કર્યો હોય તો ત્રણ વર્ષની અંદર એની સામે ફરિયાદ કરવી જોઈએ. નહીં તો કોર્ટ એવી ફરિયાદ ધ્યાનમાં નથી લેતી.’

‘હા, હા, લિમિટેશન ઍક્ટમાં ત્રણ વર્ષની સમયમર્યાદા રાખવામાં આવી છે.’

‘આ સ્ત્રીઓ આટલાં વર્ષો સુધી મૂંગી કેમ રહી હશે?’

‘એમના હસબન્ડ માટે, પણ આ વાત એમના માટે ખૂબ આઘાતજનક હશે.’

‘હાસ્તો, એઠી થાળીનું ખાવાનું કોને ભાવે!’

‘મને તો લાગે છે આ બધી સ્ત્રીઓને એમના પતિઓ હવે ત્યજી દેશે.’

‘ધોબીની વાત સાંભળીને ભગવાન રામે જેમ સીતાજીને ત્યજી દીધા હતા એમ? હા…હા…હા…’

‘પણ હજુ સુધી મિસ્ટર સત્યેન શાહ કેમ આવ્યા નથી? ૧૦ઃ૪૦ થયા. આપણે બધા રિપોર્ટરો કંઈ નવરા નથી કે ફાલતુની જેમ આપણને અહીં બેસાડી રાખવામાં આવ્યા છે.’

‘હા, હા, શૅમ્પેન પીવડાવી અને બ્રેકફાસ્ટ કરાવ્યો એટલે કંઈ આપણે ગુલામી થોડી લખી આપી છે. ક્યાં ગઈ પેલી મિસ્ટર સત્યેન શાહની સેક્રેટરી?’ રિપોર્ટરો હવે જરા અધીરા બન્યા હતા.

અચાનક અટલને પાછો આવેલો જોતાં અચલાને નવાઈ લાગી. એકદમ કૉન્ફરન્સ હૉલમાંથી બહાર નીકળી જઈ એક-દોઢ કલાક પછી અટલનું ફરી પાછું ત્યાં આવવું અચલાને જરા વિચિત્ર લાગ્યું. શું અટલે કોઈ પેંતરો રચ્યો હશે? સત્યેન શાહ કદાચ બિલ્ડિંગમાં આવી પહોંચ્યા હોય, એમની ઑફિસમાં હોય, અટલને એની ગંધ આવી ગઈ હોય. એ એકલો એકલો એમની ઑફિસમાં સત્યેન શાહને મળી આવ્યો હશે? અટલ આટલો વખત ક્યાં ગયો હતો એ જાણવાની અચલાને તાલાવેલી થઈ. મોડો આવ્યો હોવાને કારણે અટલને ટેબલની બાજુની જ આગલી હરોળની ખુરસીમાં બેસવા ન મળ્યું. એ પાછળની ત્રીજી હરોળની ખુરસીમાં બેઠો હતો. સત્યેન શાહ જ્યાં બેસે એની બાજુની જ ખુરસી પકડી અચલા એમાં બેઠી હતી. એના મનમાં જે જાણવાની તાલાવેલી હતી એ સંતોષવા એ ખુરસીમાંથી ઊભી થઈ અટલ આગળ ગઈ. અચલા જેવી ઊભી થઈ કે પાછળની ખુરસીમાં બેઠેલા એક રિપોર્ટરે એની જગ્યા પચાવી પાડી.

‘સવાર સવારના ક્યાં ફરી આવ્યો?’ અટલની બાજુની ખુરસીમાં બેસતાં અચલાએ પ્રશ્ન કર્યો.

‘કશે નહીં. બસ, મિસ્ટર સત્યેન શાહને મળવા ગયો હતો.’ અટલે અચલાને ઈર્ષ્યા પમાડવા સાચી વાત છુપાવી નહીં, પણ અડધી જ કરી.

‘હેં… ખરેખર? ક્યાં ઉપર એમની ઑફિસમાં મળવા ગયો હતો?’

અચલાના આ સવાલનો અટલે જાણીજોઈને કોઈ જવાબ ન આપ્યો. એણે આપેલું એક સ્મિત જ અચલાને અકળાવવા માટે પૂરતું હતું.

હવે અટલે આગલી રૉમાં જેણે અચલાની સીટ પચાવી પાડી હતી એ રિપોર્ટરને ઉદ્દેશીને કહ્યુંઃ ‘જરા જુઓને, મિસ્ટર શાહ હજુ કેમ આવ્યા નથી. એમની સેક્રેટરીને પૂછો ને?’ એની ઉપેક્ષા કરતું અટલનું વર્તન અને એના સવાલનો જવાબ ન આપતાં અટલે કરેલા આવા વિચિત્ર સવાલે અચલાને વધુ અકળાવી.

Related Posts
1 of 34

કોઈને કંઈ પૂછવાની જરૃર ન પડી. સત્યેન શાહની સેક્રેટરીએ જાતે જ કૉન્ફરન્સ રૃમમાં આવીને બધાંને ઉદ્દેશીને કહ્યું ઃ ‘માફ કરજો. મિસ્ટર સત્યેન શાહ ઘરેથી તો ક્યારના નીકળી ગયા છે. હજુ સુધી અહીં કેમ આવ્યા નથી એની અમને નવાઈ લાગે છે. આપ સૌએ આટલી ધીરજ ધરી છે તો થોડી વધારે રાહ જુઓ.’

‘પણ સત્યેન શાહ આ પ્રેસ કૉન્ફરન્સમાં આવવાના છે કે નહીં?’ કોઈએ પ્રશ્ન કર્યો ઃ ‘કૉન્ફરન્સ તો એમણે જ બોલાવી છે.’

‘હા, હા, કૉન્ફરન્સ કૅન્સલ કરવાનો કોઈ જ મેસેજ નથી. સત્યેન શાહ હજુ સુધી અહીં કેમ નથી આવ્યા એની અમે તપાસ કરી રહ્યા છીએ.’

‘એમાં તપાસ શું કરવાની હોય. મોબાઇલ પર એમનો કૉન્ટેક્ટ કરો.’ એક બીજા રિપોર્ટરે સલાહ આપી.

‘તમને શું લાગે છે અમે એ નહીં કર્યો હોય? તેઓ એમનો મોબાઇલ ઘરે જ ભૂલી ગયા છે.’

‘હા, હા, પણ એમના ડ્રાઇવરનો સંપર્ક કરો. એમના ડ્રાઇવર આગળ પણ મોબાઇલ હશે જ ને?’ હવે ત્રીજા રિપોર્ટરે એનું જ્ઞાન પ્રદર્શિત કર્યું.

‘સર, આજે એમની ગાડીમાં નથી નીકળ્યા.’

‘શું? શું? મિસ્ટર સત્યેન શાહ એમના બંગલામાંથી ગાડી વિના જ બહાર નીકળ્યા છે? મોટા માણસોને પણ ઘણી વાર ચાલવાના અભરખા થતા હોય છે.’ ચોથા રિપોર્ટરે આશ્ચર્ય વ્યક્ત કર્યું.

‘મહેરબાની કરીને આપ આવી બધી કોમેન્ટ બંધ કરો. મિસ્ટર સત્યેન શાહ થોડીવારમાં આવતા જ હશે. કોઈને ચા-કૉફી પીવી હોય તો જણાવજો.’

* * *

‘સત્યેન, બહાર જો, સિંધી લોકોનું ટોળું ભેગું થયું છે. મોટા મોટા અવાજે તેઓ તારી વિરુદ્ધ બોલી રહ્યા છે.’

સત્યેન અને સાવિત્રીના બેડરૃમ અલગ અલગ હતા. આધેડ વયના ઇન્ડસ્ટ્રિયાલિસ્ટો અને બિઝનેસમેનો આવું પસંદ કરતા હોય છે. એમને અડધી રાતના પરદેશમાં ટેલિફોન કરવા હોય છે. ત્યાંથી કૉલ આવતા હોય છે. મોડી રાત સુધી વાંચવાની ટેવ હોય છે. વહેલા ઊઠવાની આદત હોય છે. પતિ-પત્નીને ટીવી ઉપર જુદા જુદા કાર્યક્રમો જોવા હોય છે. પોતપોતાની સગવડ માટે તેઓ એમના બેડરૃમ અલગ હોય એવું ઇચ્છે છે. સત્યેન અને સાવિત્રીના બેડરૃમ પણ આવા જ કારણોસર જુદા હતા. એમની વચ્ચેનો પ્રેમ ખૂટી નહોતો ગયો. મનમેળ અકબંધ હતો. ફક્ત સગવડ ખાતર અને એક વ્યક્તિ બીજીને ડિસ્ટર્બ ન કરે એ માટે એમણે એમના શયનખંડો અલગ રાખ્યા હતા.

બહાર ટોળાંનો શોરબકોર ખૂબ જ વધી જતાં સાવિત્રીએ સત્યેનના બેડરૃમના દરવાજાને નૉક કર્યો. જવાબ ન મળતાં એ બોલી ઃ ‘સત્યેન, બહાર જો, સિંધી લોકોનું ટોળું ભેગું થયું છે. મોટા મોટા અવાજે તેઓ તારી વિરુદ્ધ બોલી રહ્યા છે.’ આવું કહેવા છતાં અંદરથી કંઈ જવાબ ન મળ્યો એટલે સાવિત્રીએ દરવાજાનું હૅન્ડલ ફેરવ્યું અને એ ખોલીને એ સત્યેનના બેડરૃમમાં પ્રવેશી. સત્યેન ત્યાં નહોતો. બેડરૃમને એટેચ બાથરૃમનો દરવાજો ખોલ્યો. સત્યેન ત્યાં પણ નહોતો. ક્યાં ગયો હશે? કદાચ લાઇબ્રેરીમાં બેઠો હશે. આવું વિચારીને સાવિત્રી સત્યેનની લાઇબ્રેરી-કમ-ઑફિસ તરફ ગઈ. એ ત્યાં પણ નહોતો. પછી તો સાવિત્રી આખા બંગલામાં ફરી વળી. સત્યેન ક્યાંય નહોતો. કાંતિલાલ અને મંથન પણ હવે ચિંતામાં પડ્યા.

‘પપ્પા, જરૃર રાઇડિંગ કરવા ગયા હશે.’ મંથને કહ્યું. એણે તરત જ રાઇડિંગ સ્કૂલમાં ફોન જોડ્યો.

‘પપ્પા આજે રાઇડિંગ સ્કૂલમાં ગયા જ નથી. તો પછી જરૃર ઑફિસે પહોંચી ગયા હશે. આજે એમણે પ્રેસ કૉન્ફરન્સ બોલાવી હતી ને.’ મંથને રાઇડિંગ સ્કૂલમાં કરેલ ફોન કટ કરતાં ઑફિસમાં ફોન લગાવ્યો.

‘નો સર, મિસ્ટર સત્યેન શાહ હજુ અહીં આવ્યા નથી. બધા જ પ્રેસ રિપોર્ટરો એમની વાટ જુએ છે.’ સત્યેનની સેક્રેટરીએ મંથનને જણાવ્યું.

હવે બાપ-દીકરો અને પત્ની ત્રણેય વિચારમાં પડ્યાં.

‘સત્યેન ગયો ક્યાં હશે? ઘરે નથી, રાઇડિંગ સ્કૂલમાં નથી. ઑફિસમાં નથી.’ બહાર જાય તો સત્યેન નક્કી સાવિત્રીને કહીને જ જાય. આમ એકાએક સાવિત્રીને કહ્યા વગર સત્યેનનું બહાર જવું બધાંને અજુગતું લાગ્યું. મંથને હવે સત્યેન શાહ જે જે સંસ્થાઓ જોડે સંકળાયેલા હતા ત્યાં, એમના સોલિસિટર મિસ્ટર જોશી તેમ જ મિત્રોને વારાફરતી ફોન કર્યા. સત્યેન શાહ કશે જ નહોતા.

બહાર ટોળાંનો અવાજ વધતો જતો હતો. મંથને પોલીસમાં કમ્પ્લેઇન કરી હતી એટલે વરલી પોલીસસ્ટેશનથી એક પોલીસ વૅન ક્યારની એમના બંગલા આગળ આવી પહોંચી હતી. ટોળાંને શાંત પાડવા અને વિખેરવાનો પોલીસ પ્રયત્ન કરી રહી હતી. આખરે એ ટોળાંએ મોટેથી સ્લોગનો બોલવાનું બંધ કર્યું. તેઓ બધાં મધુરિમાની ફૂટપાથ ઉપર બેસી ગયાં. સત્યેન બંગલાની અંદર નહોતો એની એમાંના કોઈને પણ જાણ નહોતી. એ લોકો કોણ હતાં? શા માટે એમણે આવો મોરચો આણ્યો હતો? આ બધી બાબતો વિશે ન વિચારતાં સત્યેનની પત્ની, પુત્ર અને પિતા એ ચિંતામાં પડી ગયાં હતાં કે ‘સત્યેન ગયો ક્યાં છે?’

એસ.એસ. હાઉસના સાતમા માળે આવેલ કૉન્ફરન્સ રૃમની દીવાલની મધ્યમાં મૂકવામાં આવેલ ઘડિયાળનો કાંટો અગિયાર વાગ્યા છે એમ જણાવતો હતો. એ આખી દીવાલ ઘડિયાળોથી ભરાયેલી હતી. લગભગ ત્રીસેક જેટલાં જુદા-જુદા ઘડિયાળો ત્યાં ટીંગાડવામાં આવ્યા હતા અને દરેક ઘડિયાળ, જાપાનથી માંડીને ન્યૂઝીલેન્ડ સુધીના જુદા જુદા દેશોનો સમય દર્શાવતા હતા. જે-તે દેશનો સમય દર્શાવતું ઘડિયાળ એ દેશમાં બનેલું ઘડિયાળ હતું. આ દીવાલને જોતાં જ એ વાત કળાઈ જતી હતી કે એસ.એસ. હાઉસમાં જે કંપનીઓ આવેલી છે એ બધી ગ્લોબલ કંપનીઓ છે. એમનો વ્યાપાર વિશ્વના બધા જ દેશોમાં ફેલાયેલો છે.

રિપોર્ટરો હવે અકળાઈ ગયા હતા. બે-ચાર જણ તો ઊભા થઈને કૉન્ફરન્સ રૃમની બહાર ચાલી ગયા હતા. અત્યાર સુધી શાંતિથી આપસમાં વાતચીત કરતા રિપોર્ટરોના અવાજો હવે કોલાહલ બની ગયા હતા.

‘શું થયું હશે?’

‘મિસ્ટર સત્યેન શાહ તો ખૂબ જ પંક્ચુઅલ છે. નક્કી કંઈક અણધાર્યું બન્યું હશે.’

‘એમનો એક્સિડન્ટ તો નહીં થયો હોય ને?’

‘ના, ના, તો તો એની જાણ એમની ઑફિસને તુરંત થઈ જાય.’

‘અરે મિસ અચલા, આ પાંચેય સ્ત્રીઓમાંની એક પણ સ્ત્રીનો ઇન્ટરવ્યૂ તમે હજુ સુધી કર્યો નથી. આમ કેમ? આવી વાતમાં તો તમે હંમેશાં પહેલા હો છો.’ ‘ગજગામિની’ના રિપોર્ટર ધર્મેશ પંડ્યાએ અચલાને પ્રશ્ન કર્યો.

‘ગરવો ગુજ્જુ’ના તંત્રી રાજેશ શાહે અચલા વતી જવાબ આપ્યો.

‘ધર્મેશ, તને ખબર નથી, અચલા પેલા બીયરના બાદશાહ અજય મોતાનો ઇન્ટરવ્યૂ કરવા ખાસ ઇંગ્લેન્ડ ગઈ હતી.’

‘અજય ઍરલાઇન્સમાં ગઈ હશે.’ ‘હિન્દુસ્તાની’ અખબારના તંત્રી પવન મિશ્રાએ મજાક કરી.

‘એટલે તમે હિન્દુસ્તાનનું કરોડોનું કરી ગયેલી, બીયરની કંપનીઓ અને ઍરક્રાફ્ટ ધરાવતી કંપનીના માલિક અજય મોતાનો ઇન્ટરવ્યૂ કરવા ખાસ ઇંગ્લેન્ડ ગયાં હતાં?’ એક સાવ નવી રિપોર્ટરે આશ્ચર્ય દર્શાવતાં અચલાને પૂછ્યું.

‘તમારો એ ઇન્ટરવ્યૂ કયા મૅગેઝિન યા અખબારમાં છપાવાનો છે?’ બીજી નવોદિત રિપોર્ટરે અચલા પહેલી રિપોર્ટરના સવાલનો જવાબ આપે એ પહેલાં બીજો સવાલ કર્યો.

‘મેં અજય મોતાનો ઇન્ટરવ્યૂ નથી કર્યો.’ અચલાએ ટૂંકો ને ટચ જવાબ આપ્યો.

‘એટલે? તમે છેક ઇંગ્લેન્ડ અજય મોતાનો ઇન્ટરવ્યૂ કરવા ગયાં અને એ કર્યા સિવાય જ હાથ ઘસતાં પાછાં આવ્યાં? અચલા ઘોઘે જઈ આવી અને ડેલે હાથ દઈ આવી.’ પવન મિશ્રાએ ફરી પાછી અચલાની મજાક ઉડાવી.

અચલાએ મોઢું ફેરવી લીધું. પવન મિશ્રાની મજાકનો જવાબ ન આપ્યો. ધૂંધવાઈને એ એની ખુરસી ઉપરથી ઊભી થઈ. જે રિપોર્ટરે એની આગલી સીટની જગ્યા પચાવી પાડી હતી એની પાસે જઈને સત્તાવાહી અવાજમાં કહ્યું, ‘આ મારી સીટ છે. તમે પ્લીઝ, અહીંથી ઊઠો.’

પેલો રિપોર્ટર અચલાનો રુઆબ અને ગુસ્સો જોઈને ગુપચુપ ઊભો થઈ ગયો. અચલા ધબ દઈને એ ખુરસીમાં બેસી ગઈ. ગુસ્સાથી એનું માથું ફાટફાટ થતું હતું. એનું જો ચાલત તો એ પવન મિશ્રાનું બધા રિપોર્ટરોની વચ્ચે એની આવી મજાક કરવા બદલ ગળું દબાવી દેત.

અટલને હવે એ જાણવાની ઇન્તેજારી થઈ કે અચલા અજય મોતાનો ઇન્ટરવ્યૂ કર્યા સિવાય ઇંગ્લેન્ડથી પાછી કેમ આવી ગઈ? ભલભલા ક્રિમિનલો, રાજકારણીઓ, ઍક્ટરો, ઉદ્યોગપતિઓ તેમ જ સાધુ-મહાત્માઓ, જેઓ પત્રકારોને ઇન્ટરવ્યૂ આપવાનું ટાળતા હોય છે એમના પણ અચલાએ યેનકેન પ્રકારેણ, જાતજાતની-ભાતભાતની તરકીબો વાપરીને ઇન્ટરવ્યૂઓ લીધા હતા તો અજય મોતાનો ઇન્ટરવ્યૂ એણે કેમ ન કર્યો? અટલને પોતાની ખુરસી ઉપરથી ઊભા થઈને અચલા પાસે જઈને આ વાત જાણવાની ઇચ્છા થઈ આવી, પણ એણે એ રોકી રાખી.

પવન મિશ્રાએ હવે અચલાને સૌપ્રથમ પ્રશ્ન કરનાર નવી રિપોર્ટરને પૂછ્યું, ‘તમે કયા અખબારનાં રિપોર્ટર છો?’

‘અગ્નિપથ’ મૅગેઝિન.’

‘ઓહ… હોહો… આવડું મોટું સર્ક્યુલેશન ધરાવતાં મૅગેઝિને તમારા જેવી નવીસવી છોકરીને એમને ત્યાં રિપોર્ટર રાખી?’ પવન મિશ્રા કોઈની પણ મજાક ઉડાડવામાં કે એને ઉતારી પાડવામાં એક્કો હતો.

‘મિસ્ટર, તમે જે હો તે. હું તમને ઓળખતી નથી, પણ મેં જે આ પાંચ સ્ત્રીઓએ મિસ્ટર સત્યેન શાહ ઉપર આરોપ મૂક્યા છે એમાંની એક સ્ત્રી, ટોચની અભિનેત્રી મહેક મોમિનનો ઇન્ટરવ્યૂ કર્યો છે. આ લો, ‘અગ્નિપથ’નો લેટેસ્ટ ઇશ્યૂ આજે જ બહાર પડ્યો છે. એમાં મેં કરેલો મિસ મહેક મોમિનનો ઇન્ટરવ્યૂ છપાયો છે. એ પહેલાં વાંચો. પછી મારી કાબેલિયત તરફ આંગળી ઉઠાવો.’ અચલાની જેમ જ આ રિપોર્ટરે પણ મિશ્રા સામે એનો રોષ વ્યક્ત કર્યો. ફરક એટલો જ હતો કે અચલાએ મૌન સેવીને એ અભિવ્યક્ત કર્યો હતો, જ્યારે જાગૃતિ જોશીએ સામું સંભળાવીને એ જાહેર કર્યો હતો. આજુબાજુ બેઠેલા બીજા રિપોર્ટરો આ યુવાન રિપોર્ટરે જે જુસ્સાભેર મિશ્રાને ઝાટક્યો હતો એ જોઈને આભા બની ગયા. મિશ્રા પણ છોભીલો પડી ગયો. એને આવી આજકાલની નવી છોકરી સામો જવાબ આપશે એની મુદ્દલે આશા નહોતી. પોતાનું છોભીલાપણુ છુપાવવા મિશ્રાએ જાગૃતિએ ધરેલ ‘અગ્નિપથ’નો ઇશ્યૂ ખોલીને એમાં અભિનેત્રી મહેક મોમિનનો જે ઇન્ટરવ્યૂ છપાયો હતો એ વાંચવાનું શરૃ કર્યું. એની આજુબાજુ બેઠેલા બીજા રિપોર્ટરોએ પણ ઉત્કંઠાપૂર્વક મિશ્રાના હાથમાંના મૅગેઝિનમાં મોઢું નાખીને જાગૃતિએ કરેલ ઇન્ટરવ્યૂ વાંચવાનો પ્રયત્ન કર્યો.

‘તમારી પાસે મૅગેઝિનની બીજી કૉપીઓ છે? સત્યેન શાહ આવે ત્યાં સુધી વાંચીએ કે અભિનેત્રી મહેક મોમિનની જોડે સત્યેન શાહે શું કર્યું હતું.’ મિશ્રાની બાજુમાં બેઠેલા એક રિપોર્ટરે જાગૃતિને વિનંતી કરી.

‘હા… હા. આ લો.’ એમ કહીને રિપોર્ટર જાગૃતિએ પોતાની પાસેના ‘અગ્નિપથ’ની બીજી કૉપીઓ ત્યાં બેઠેલા ચાર રિપોર્ટરોને આપી.

સેન્ટર પેજ ઉપર એક સમયની ટોચની અભિનેત્રી મહેક મોમિનનો વીસ વર્ષ પહેલાંનો તેમ જ આજનો, એમ બંને ફોટા બાજુબાજુમાં છાપવામાં આવ્યા હતા. એ અભિનેત્રી બંનેમાં સુંદર દેખાતી હતી. એમ કહોને કે ઉંમરે એની સુંદરતામાં બિલકુલ ઘટાડો કર્યો ન હતો. આ બંને ફોટાઓની બાજુમાં જ, પણ એ ફોટાઓથી કદમાં ચોથા ભાગનો ફોટો મહેક મોમિનનો ઇન્ટરવ્યૂ કરનાર રિપોર્ટર જાગૃતિ જોશીનો હતો. અત્યંત સુંદર મહેકની બાજુમાં છપાયેલ

જાગૃતિ જોશીનો ફોટો પણ આકર્ષક હતો. એ રિપોર્ટર પણ દેખાવમાં મહેકથી ઓછી ઊતરે એવી નહોતી. આર્ટિકલનું શીર્ષક હતું,

‘ઈંમી ટૂઃ સમાજના દૂષણ અને વ્યભિચારીનો પર્દાફાશ’

(ક્રમશઃ)
——————

Leave A Reply

Your email address will not be published.

Translate »