તમારા માટે, તમારી સાથે, સતત…

૩૦૦ પાદરીઓ દ્વારા જાતીય શોષણ કર્યાનો રિપોર્ટ જાહેર

ખિસકોલીએ પીછો કરતાં પોલીસ બોલાવી

0 69
  • વિશ્વવૃત્ત

ખિસકોલીએ પીછો કરતાં પોલીસ બોલાવી
જર્મનીમાં એક વિચિત્ર કિસ્સો બન્યો છે. ખિસકોલીનું એક બચ્ચું પોતાનો પીછો કરતું હોવાની આશંકાથી એક વ્યક્તિએ પોલીસને બોલાવી લીધી હતી. જર્મનીના કાર્લશ્રુહે સિટી પોલીસની ઇમરજન્સી સર્વિસને એક ગભરાયેલી વ્યક્તિએ ફોન કરીને એવી જાણકારી આપી કે ખિસકોલીનું એક નાનું બચ્ચું તેની પાછળ પડ્યું છે. આ મેસેજ મળતાંની સાથે જ ઇમરજન્સી સર્વિસના અધિકારીઓ સ્થળ પર પહોંચી ગયા હતા. અધિકારીઓએ જોયું તો ખિસકોલીનું એક બચ્ચું જમીન પર પડેલું હતું અને તે સૂઈ રહ્યું હોવાનું જણાયું હતું. પોલીસના પ્રવક્તા ક્રિસ્ટીના ક્રેન્ઝે જણાવ્યું કે, ‘ઘણીવાર માતા ગુમાવનારાં ખિસકોલીનાં બચ્ચાં વિકલ્પ શોધતાં હોય છે. જ્યારે તેમની નજરમાં કોઈ વ્યક્તિ આવે ત્યારે તેઓ તેની તરફ સંપૂર્ણ ધ્યાન કેન્દ્રિત કરી લેતાં હોય છે અને તેમની પાછળ – પાછળ જવા લાગતાં હોય છે. આ કિસ્સામાં પણ આવું જ કાંઈક બન્યું હોવાનું લાગી રહ્યું છે. ખિસકોલીનું આ બચ્ચું તેની માતાને ગુમાવી બેઠું છે અને હકીકતમાં તો તે બચ્ચાને મદદની જરૃર હતી.’ ખિસકોલીના આ બચ્ચાને ‘કાર્લ ફ્રેડરિક’ નામ આપવામાં આવ્યું છે અને હાલમાં એનિમલ રેસ્ક્યુ સેન્ટર ખાતે તેની સંભાળ લેવામાં આવી રહી છે. જર્મનીમાં કોઈ ખિસકોલીએ પીછો કર્યાે હોય અને પોલીસ બોલાવવી પડી હોય તેવો તાજેતરમાં આ બીજો બનાવ અખબારોની હેડલાઇન્સ બન્યો છે. અગાઉ લંડનમાં પણ એક મહિલાએ ફોન કરી પોલીસ બોલાવી હતી. આ મહિલાના ઘરમાંથી વિચિત્ર અવાજ આવતા હતા. એક ખિસકોલી મોટો અવાજ કરીને તે મહિલાને પરેશાન કરતી હોવાનું ખૂલ્યું હતું.
——————————-.

બર્મ્યુડા ટ્રાયેન્ગલનું રહસ્ય ઉકેલ્યાનો દાવો
વૈજ્ઞાનિકોએ બર્મ્યુડા ટ્રાયેન્ગલના રહસ્ય પરથી પરદો ઉઠાવી લીધો હોવાનો તાજેતરમાં દાવો કર્યાે છે. વૈજ્ઞાનિકોએ કરેલા દાવા પ્રમાણે બર્મ્યુડા ટ્રાયેન્ગલ ખાતે ભૂતકાળમાં બનેલી રહસ્યમયી ઘટનાઓની પાછળ એલિયન કે ઊડતી રકાબી અથવા તો સમુદ્રી દાનવોનો જરા પણ હાથ નથી. આવી ઘટનાઓ બનવા પાછળ સમુદ્રનાં રાક્ષસી મોજાં હોવાનું વૈજ્ઞાનિકોનું માનવું છે. ઉત્તર એટલાન્ટિક મહાસાગરમાં મોટા ભાગે માયામી, બર્મ્યુડા અને પ્યુર્ટાેરિકોથી ઘેરાયેલો બર્મ્યુડા ટ્રાયેન્ગલ-ત્રિકોણીય વિસ્તાર ‘ડેવિલ્સ ટ્રાયેન્ગલ’ એટલે કે ‘શેતાનનો વિસ્તાર’ તરીકે કુખ્યાત છે. ભૂતકાળમાં બર્મ્યુડા ટ્રાયેન્ગલ પરથી ઊડેલાં કેટલાંય વિમાનો અને જહાજો રહસ્યમય સંજોગોમાં ગાયબ થઈ ગયાના ઘણા કિસ્સા નોંધાયા છે.

જોકે, તાજેતરમાં વૈજ્ઞાનિકોએ આવા દાવાઓને પાયાવિહોણા ગણાવીને ફગાવી દીધા છે. તેમનું માનવું છે કે, અહીં બનતી અસામાન્ય ઘટનાઓ પાછળ બીજું કોઈ નહીં, પરંતુ સમુદ્રમાં ઊઠતાં રાક્ષસી મોજાંઓ જવાબદાર છે. યુનિવર્સિટી ઓફ સાઉધમ્પટનના સમુદ્રવિજ્ઞાની સિમોન બોક્સાલના મત મુજબ, બર્મ્યુડા ટ્રાયેન્ગલમાં દક્ષિણથી ઉત્તર દિશામાં ઊઠતાં સમુદ્રી તોફાનો જ્યારે ભેગાં થાય ત્યારે તે એક ખૂબ જ શક્તિશાળી અને ઉગ્ર મોજાંનું સ્વરૃપ ધારણ કરે છે. આ સમુદ્રી મોજાં ૧૦૦ ફૂટ ઊંચાં હોય છે. તેમના માર્ગમાં આવતાં શક્તિશાળી જહાજોને પણ તહસનહસ કરી નાંખે છે. અત્યાર સુધી આવી જે પણ ઘટનાઓ બની તેની પાછળ રાક્ષસી મોજાં જ જવાબદાર છે.
——————————-.

કાગડાઓને કચરો ઉપાડવાની તાલીમ
ફ્રાન્સના એક થીમ પાર્કમાં કચરો ઉપાડવા માટે કાગડાઓને ખાસ તાલીમ આપવામાં આવી રહી છે. અહીંના ‘પ્યુ ડ્યુ ફોઉ’ થીમ પાર્કમાં છ ચતુર કાગડાઓને સિગારેટનાં ઠૂંઠાં અને બીજી નકામી વસ્તુઓ વીણીને તેને કચરાપેટીમાં નાંખવાની તાલીમ આપવામાં આવી છે. ફ્રાન્સના પશ્ચિમી વેનડી પ્રાંતમાં આવેલા આ હિસ્ટોરિકલ થીમ પાર્કમાં કાગડાઓ માટે ભોજનનાં બોક્સ પણ મૂકવામાં આવ્યાં છે. એક સમયે જેટલો કચરો ઉપાડીને તેઓ તેને ડસ્ટબિનમાં નાંખી આવે ત્યારે તેમને બોક્સમાં રાખેલું ભોજન આપવામાં આવે છે. આ પ્રકારે ભોજનની સામે કાગડાઓ પાસેથી કામ લેવામાં આવે છે. આ ઐતિહાસિક થીમ પાર્કના પ્રમુખ નિકોલસ ડે વિલેર્સએ જણાવ્યું કે, અમારો હેતુ માત્ર સફાઈ જ કરાવવાનો નથી. અલબત્ત અહીં આવતા મુલાકાતીઓ ચોખ્ખાઈ જાળવવાનો પ્રયાસ કરતાં જ હોય છે. તેમ છતાં અમે આ નવતર પ્રયોગથી એવો સંદેશો આપવા માગીએ છીએ કે પ્રકૃતિ પોતે પણ કેવી રીતે આપણી આસપાસના પર્યાવરણની સંભાળ રાખવી તે આપણને શીખવે છે.’ વિશેષ તાલીમ આપવામાં આવી છે તે છ કાગડાઓ તેમના ટ્રેનર સાથે સંવાદ પણ કરી શકે છે. એટલું જ નહીં, તેમની સાથે વિશેષ નાતો પણ બનાવી લીધો છે. વૈજ્ઞાનિકોનું પણ માનવું છે કે કાગડો એક ખૂબ જ બુદ્ધિશાળી પક્ષી છે. સંસાધનોનો કેવો ઉપયોગ કરવો તેની ક્ષમતા તેમનામાં હોય છે. કાગડાઓ જટિલ સમસ્યાઓ ઉકેલી શકવામાં સક્ષમ હોય છે અને તેઓ માણસોના ચહેરા પણ બરોબર યાદ રાખતા હોય છે.
——————————-.

જ્યોર્જિયામાં એક લાખ ડૉલરની નૂડલ્સની ચોરી
અમેરિકાના જ્યોર્જિયામાં ચોરીનો વિચિત્ર મામલો સામે આવ્યો છે. મોટા ભાગે રોકડની કે પછી સોના-ચાંદીના દાગીનાની ચોરી થયાની ફરિયાદો નોંધાતી હોય છે, પરંતુ જ્યોર્જિયામાં તો નૂડલ્સની ચોરી થયાની ફરિયાદ નોંધાઈ છે. વધારે આશ્ચર્યજનક વાત એ છે કે, ૨૦૦-૫૦૦ ડૉલરની નહીં, પણ અધધ એક લાખ ડૉલરની નૂડલ્સ કોઈ ચોરી ગયું છે. જ્યોર્જિયાની ફેયેટી કાઉન્ટીની પોલીસ એક લાખ ડૉલરની નૂડલ્સ ચોરી જનારા ભૂખ્યા ડાંસ ચોરની તલાશ કરી રહી છે. આખો મામલો કંઈક આવો છે. જ્યોર્જિયા ઇન્ટરસ્ટેટ હાઈ-વે પર આવેલા ચેવરલોન સ્ટોર ખાતે નૂડલ્સ અને સૂપનો જથ્થો ભરેલું ૫૩ ફૂટ લાંબું ટ્રેલર પાર્ક કરેલું હતું. આ ટ્રેલરના કન્ટેનરમાં એક લાખ ડૉલરની કિંમતની નૂડલ્સ અને સૂપનો જથ્થો ભરેલો હતો. નૂડલ્સ અને સૂપનો આ જથ્થો અન્યત્ર જગ્યાએ લઈ જવાનો હતો. દરમિયાન ચેવરલોન સ્ટોર ખાતે પાર્ક કરેલું નૂડલ્સ અને સૂપ ભરેલું કન્ટેનર જ ત્યાંથી ગાયબ થઈ ગયું હતું. સ્થાનિક પોલીસના શેરિફના જણાવ્યા મુજબ કોઈ ભેજાબાજ વ્યક્તિ નૂડલ્સ ભરેલું આખું કન્ટેનર જ ટ્રેલર સાથે ત્યાંથી હંકારી ગયો હતો. ટ્રેલરનો માલિક પણ એક લાખ ડૉલરની નૂડલ્સની ચોરી થયાનું જાણી સ્તબ્ધ થઈ ગયો હતો. જ્યોર્જિયાના અતિવ્યસ્ત હાઈવે પરથી આવી ચોરી થયાનું જાણી પોલીસ પણ વિચારમાં પડી ગઈ હતી. આટલી બધી નૂડલ્સનું તે ચોર આખરે કરશે શું તેની કોઈને કશી ખબર નથી. હાલમાં તો પોલીસ નૂડલ્સ ચોરી જનારા ભેજાબાજને શોધી રહી છે.
——————————-.

માણસના પગ જેવું આઠ કિલોનું બટેટું!
બ્રાઝિલમાં એક ખેડૂતના ખેતરમાં માણસના પગ જેવું જ આઠ કિલોગ્રામ વજન ધરાવતું બટેટું ઊગી નીકળતાં આશ્ચર્ય ફેલાયું છે. દક્ષિણ બ્રાઝિલના પ્રાંત સેન્ટા કેન્ટેરિનામાં મેલીરો ટાઉનમાં રહેતા ખેડૂત દંપતી મારલી અને પોલો સિક્વેનેલએ આવા આશ્ચર્યજનક આકારના બટેટાની શોધ કરી છે. તસવીરમાં જોઈ શકાય છે તેમ આવું કદાવર બટેટું બિલકુલ માણસના પગના આકારમાં ઊગી નીકળ્યું છે. વિચિત્ર આકાર ધરાવતા બટેટામાં માણસના પગમાં જોવા મળે છે તેવો અંગૂઠો અને અન્ય આંગળીઓ પણ સ્પષ્ટ રીતે ઊગી નીકળેલી જોવા મળે છે. અંગૂઠા જેવો ભાગ મૂળિયામાં લપેટાયેલો હોઈ દૂરથી જોતાં વાળ ઊગ્યા હોય તેવું જણાય છે. આ બટેટું પગના ઘૂંટણ સુધી પહોંચે તેટલું ઊંચું પણ છે.

Related Posts
1 of 57

આ અંગે ખેડૂત મારલીએ જણાવ્યું કે, ‘મેં મારા ખેતરમાં બટેટા ઉપરાંત અન્ય શાકભાજીનું વાવેતર કર્યું હતું, પરંતુ મેં મારી જિંદગીમાં આવું વિચિત્ર આકાર ધરાવતું બટેટું ઊગી નીકળશે તેવું ક્યારેય વિચાર્યું પણ ન હતું કે આવું બટેટું મેં ક્યારેય અગાઉ જોયું પણ નથી. આ બટેટાનું શું કરવું તે વિશે અમે હજુ સુધી કાંઈ વિચાર્યું નથી. લોકો આને જોવા માગતા હોય તો અમે કદાચ તેને પ્રદર્શનમાં મૂકવા અંગે વિચારી શકીએ, પરંતુ ખેતરમાં પાકની લણણી દરમિયાન જ્યારે અમે આ બટેટું કાઢ્યું ત્યારે એક તબક્કે તો અમે પણ ભયભીત થઈ ગયા હતા.’  આ ખેડૂત દંપતી છેલ્લાં છ વર્ષથી બટેટાનું વાવેતર કરે છે, પરંતુ તેમના ખેતરમાં આવું વિચિત્ર બટેટું પહેલીવાર જ ઊગી નીકળ્યું છે.
——————————-.

રશિયામાં વિચિત્ર દરિયાઈ જીવ તણાઈ આવ્યો
રશિયામાં પૂર્વીય દરિયાકાંઠેથી એક વિચિત્ર અને રહસ્યમયી દરિયાઈ જીવ તણાઈ આવતાં સ્થાનિક રહીશો મૂંઝવણમાં મુકાયા હતા. દુર્ગંધ મારતા આ વિશાળ દરિયાઈ જીવના અવશેષોને જોવા લોકો એકઠા થઈ ગયા હતા. આ વિચિત્ર દરિયાઈ જીવને માથું કે આંખો નથી, પણ તે લાંબી રુવાંટીમય પૂંછડી ધરાવે છે. આ વિચિત્ર જીવ આદિમકાળનો હોવાનું સ્થાનિકો અનુમાન લગાવી રહ્યા છે. તે ગહન સમુદ્રમાંથી ઉપર કેવી રીતે આવ્યો તે વિશે કોઈ સચોટ અનુમાન લગાવી શકતું નથી. દરમિયાન મરીન વૈજ્ઞાનિકોએ આ વિચિત્ર જીવ વ્હેલની પ્રજાતિનું પ્રાણી હોવાનું પ્રાથમિક તપાસ બાદ જાહેર કર્યું છે. પેસિફિકના દરિયાકાંઠે વસેલા રશિયાના પખાચી ગામના સ્થાનિક રહીશોએ વિચિત્ર જીવને ‘દરિયાઈ રાક્ષસ’ એવું ઉપનામ આપ્યું છે. આ જીવ એટલો વજનદાર હતો કે તેને ખસેડતાં સ્થાનિકોને નાકે દમ આવી ગયો હતો. સ્વેટલાના ડ્યાડેન્કો નામની પ્રત્યક્ષદર્શીએ જણાવ્યું કે, ‘આ જીવ નળી જેવા આકારમાં રુવાંટીથી લપેટાયેલો હતો. આ કોઈ પ્રાચીન સમયનો જીવ હોય તેવું પ્રથમ દૃષ્ટિએ જોતાં લાગી રહ્યું હતું. કદાચ તે રુવાંટીમય ઓક્ટોપસ હોય તેવું પણ શક્ય છે. વૈજ્ઞાનિકોએ આ જીવ વિશે વધારે જાણકારી મેળવવી જોઈએ તેવું મને લાગે છે. આવું વિચિત્ર પ્રાણી મેં મારી જિંદગીમાં અગાઉ ક્યારેય જોયું નથી.’ અન્ય એક પ્રત્યક્ષદર્શીએ એવું જણાવ્યું કે, ગ્લેશિયર ઓગળતાં આ જીવ તેમાંથી બહાર આવ્યો હોય તેવું લાગી રહ્યું છે. ૧૯૬૨માં તાસ્માનિયામાં આવો જ વિચિત્ર જીવ તણાઈ આવ્યો હતો. તેને ગ્લોબસ્ટર નામ અપાયું હતું.
——————————-.

૩૦૦ પાદરીઓ દ્વારા ૧૦૦૦ બાળકોનું જાતીય શોષણ કર્યાનો રિપોર્ટ જાહેર
પેન્સિલ્વેનિયાની સુપ્રીમ કોર્ટે કેથોલિક ચર્ચના પાદરીઓ દ્વારા બાળકો સાથે આચરવામાં આવેલા જાતીય શોષણના મામલે ગ્રાન્ડ જ્યૂરીનો રિપોર્ટ જાહેર કરી દીધો છે. આ રિપોર્ટમાં એવો ખુલાસો થયો છે કે, ૩૦૦થી વધુ પાદરીઓએ છેલ્લાં ૭૦ વર્ષાેમાં એક હજારથી વધુ બાળકોનું જાતીય શોષણ કર્યું છે. એટલું જ નહીં, આ રિપોર્ટમાં એવું પણ દર્શાવાયું છે કે ચર્ચાેએ પાદરીઓના આ ગુનાઓ ઉપર પડદો પાડી દેવાની કોશિશો પણ કરી હતી. ‘વૉલ સ્ટ્રીટ જર્નલ’ના અહેવાલ મુજબ અમેરિકાના કેથોલિક ચર્ચાેમાં ચાલેલા જાતીય શોષણ અંગે અત્યાર સુધીનો આ સૌથી મોટો તપાસ અહેવાલ છે. ૧૮ મહિના ચાલેલી આ તપાસનું નેતૃત્વ એટોર્ની જનરલ જોશ શૈપિરો કરી રહ્યા હતા. તેમની સાથે હૈરિસબર્ગ, પીટ્સબર્ગ, એલેનટાઉન, સ્ક્રૈનટન, એરી અને ગ્રીન્સબર્ગ જિલ્લાઓના અધિકારીઓ પણ જોડાયા હતા. સ્ટેટ અટોર્ની જનરલ જોશ શૈપિરોએ એક પ્રેસ કોન્ફરન્સમાં જણાવ્યું હતું કે, રિપોર્ટમાં ૧૦૦૦થી વધુ પીડિતોની ઓળખ થઈ ચૂકી છે, પરંતુ ગ્રાન્ડ જ્યુરીને સંદેહ છે કે, આ સંખ્યા આનાથી ઘણી વધારે છે. ૧૪૦૦ પાનાંના આ રિપોર્ટમાં એવું ખૂલ્યું છે કે, પેન્સિલ્વેનિયા અને વેટિકનમાં ચર્ચના વરિષ્ઠ અધિકારીઓએ જાતીય શોષણના આ મામલાને વ્યવસ્થિત રીતે છૂપાવવાની ભરપૂર કોશિશો કરી હતી. શૈપિરોએ જણાવ્યું કે, આ મામલાઓને છૂપાવવાની કરેલી કોશિશોનું જ એ પરિણામ છે કે હવે આ કેસો ચલાવવા માટે પણ ઘણા જૂના થઈ ગયા છે. આ રિપોર્ટ પ્રમાણે પાદરીઓએ છોકરાઓ અને છોકરીઓ, બંનેનું જાતીય શોષણ કર્યું હતું. જેમ કે, એલનટાઉન જિલ્લામાં એક પાદરીને જ્યારે જાતીય શોષણની ફરિયાદ વિશે પૂછવામાં આવ્યું ત્યારે તેમણે એક છોકરાનું શોષણ કર્યાનું કબૂલ્યું હતું અને કહ્યું હતું કે, ‘મહેરબાની કરીને મારી મદદ કરો.’ રિપોર્ટ મુજબ એક અન્ય મામલામાં પાદરીએ ૯ વર્ષના છોકરાને ઓરલ સેક્સ કરવા માટે મજબૂર કર્યાે હતો અને ત્યાર બાદ એનું મોં ‘પવિત્ર પાણી’થી ધોઈ કાઢ્યું હતું. એક અન્ય પાદરીએ દશકાઓ અગાઉ એક છોકરી ઉપર બળાત્કાર ગુજાર્યાની વાત કબૂલી હતી. આ પાદરીના જણાવ્યા મુજબ પીડિતા એ સમયે સાત વર્ષની હતી અને હૉસ્પિટલમાં કાકડાની સારવાર કરાવવા માટે દાખલ થયેલી હતી. લગભગ ડઝનેક પાદરીઓએ આ રિપોર્ટ જાહેર થતો અટકાવવા હાઈકોર્ટના દરવાજા ખખડાવ્યા હતા, જેથી કરીને રિપોર્ટમાંથી તેમનું નામ અને એવી કોઈ પણ માહિતી હટાવી દેવાય કે જેનાથી તેમની ઓળખ છતી થઈ શકે. જો રિપોર્ટમાં તેમનાં નામ જાહેર થઈ જશે તો એનાથી તેમની છબીને ખૂબ જ નુક્સાન પહોંચશે તેવો આ પાદરીઓનો દાવો છે.
——————————-.

લંડનમાં પોપટે રેસ્ક્યુ વર્કરને ગાળો આપી
લંડનમાં મકાનની છત પર ફસાયેલા એક પોપટને બચાવવા ગયેલા ફાયર ફાઇટરના જવાનને આ પાળેલા પોપટે ગાળો આપી હોવાનો બનાવ બન્યો છે. લંડનમાં આ બનાવ હાલ ટૉક ઓફ ધી ટાઉન છે. પોપટને ટ્રેનિંગ આપો તો માણસની જેમ જ બોલી શક્તા હોય છે. મકાઉ પ્રજાતિનો લાલ રંગનો જેસી નામનો આ પોપટ પણ સારું બોલી શક્તો હતો. બન્યું એવું કે જેસી તેના માલિકના ઘેરથી ઊડી ગયો અને નજીકમાં આવેલા એક મકાનની છત પર જઈને બેસી ગયો હતો. બીજી તરફ તેનો માલિક જેસીની શોધમાં લાગી ગયો હતો. નજીકના મકાનની છત પર જેસી ત્રણ દિવસથી ફસાયો હોવાની જાણ થતાં ફાયર બ્રિગેડની મદદ લેવાઈ હતી. કેમ કે, જેસી ઊડી શક્તો ન હતો. લંડનની ફાયર બ્રિગેડનો એક જવાન તે મકાનની છત પર ચઢી જેસી પાસે પહોંચ્યો હતો. જવાને જેવો જેસી તરફ હાથ લંબાવ્યો કે તરત જ જેસી ક્રોધિત થઈ તેને ગાળો બોલવા લાગ્યો હતો. પોપટના મોઢેથી ગાળો સાંભળી ફાયર બ્રિગેડનો જવાન પણ હતપ્રભ બની ગયો હતો. જોકે, નીચે ઊભેલા માલિકે જેસી સાથે વાતો કરી તેને શાંત પાડ્યો હતો. આ દરમિયાન તે જવાને જેસીને બચાવીને નીચે ઉતાર્યાે હતો. જોકે, જેસી જેવો નીચે ઊતર્યાે કે તરત તેણે તે જવાનનો થેંક્યુ કહીને આભાર માન્યો હતો. પોપટના આવા વિચિત્ર વર્તનથી રેસ્ક્યુ વર્કર પણ પોતાનું હસવું રોકી શક્યા ન હતા. જેસી ફરી તેના માલિકના ઘેર પહોંચી ગયો છે અને હાલ તે આરામ ફરમાવી રહ્યો છે.
——————————-.

રહસ્યમયી દરિયાઈ પ્રાણી માટે સ્કોટલેન્ડનો પ્લાન શું છે?
સરોવરો અને દરિયામાં જેનું અસ્તિત્વ હોવાની દંતકથાઓ વર્ષાેથી પ્રચલિત છે તે રહસ્યમયી પ્રાણી લોચ નેસ મોન્સ્ટર જો ખરેખર મળી આવે તો શું કરવું જોઈએ? યુરોપીય દેશ સ્કોટલેન્ડે આ માટે એક પ્લાન પણ વિચારીને રાખ્યો છે. સ્કોટલેન્ડ સરકારના નેચરલ હેરિટેજ વિભાગે લોચ નેસ મોન્સ્ટર નામનું દરિયાઈ પ્રાણી ભવિષ્યમાં ક્યારેય મળી આવે ત્યારે શું શું કરવું તેની ગાઇડલાઇન્સ પણ તૈયાર કરી રાખી છે. સ્કોટિશ મિનિસ્ટર નિકોલા સ્ટર્જીઅને પણ તાજેતરમાં દાવો કર્યાે હતો કે લોચ નેસ મોન્સ્ટર ખરેખર અસ્તિત્વ ધરાવે છે. લોચ નેસ મોન્સ્ટર પ્રાણી મળી આવે ત્યારે તેને સરોવરમાં પાછું છોડી મૂકતા પહેલાં તેનું ડીએનએ સેમ્પલ લેવાનો સરકારનો ઇરાદો છે. સ્કોટિશ નેચરલ હેરિટેજના પ્રવક્તા નિક હાફહાઇડે જણાવ્યું કે, આજની તારીખમાં જો આ દરિયાઈ દૈત્ય મળી આવે છે તો આસપાસની સ્થાનિક વસ્તીને સૂચનાઓ આપવાનો કન્ટિજન્સી પ્લાન બનાવવામાં આવ્યો છે. તેમણે વધુમાં જણાવ્યું કે લોચ નેસ મોન્સ્ટર જેવા દરિયાઈ દૈત્યનું મળી આવવું ઘણુ મુશ્કેલ લાગે છે. નોંધનીય છે કે, છેક છઠ્ઠી સદીથી આ દરિયાઈ જીવ વિશે અનેક પ્રકારની દંતકથાઓ અને માન્યતાઓ પ્રવર્તી રહી છે. ૨૦૦૩માં આ જીવ દેખાયો હોવાના દાવા થતાં દરિયામાં ૬૦૦ જેટલાં સોનાર બિમ્સ અને સેટેલાઇટ ટ્રેકિંગ દ્વારા તપાસ કરવામાં આવી હતી, પરંતુ તેના અસ્તિત્વના કોઈ ઠોસ પુરાવા મળ્યા ન હતા.
——————————-.

જાપાનમાં ભૂકંપ પહેલાં બિલાડીઓનું વિચિત્ર વર્તન કેમેરામાં કેદ
જાપાનમાં તાજેતરમાં ભૂકંપ આવ્યો હતો, જેમાં જાન-માલને ઘણું નુક્સાન પહોંચ્યું હતું.
જોકે, આ ભૂકંપ દરમિયાન એક ઘટનાની સૌએ નોંધ લીધી હતી. ભૂકંંપ આવ્યો તેની દસ સેકન્ડ પહેલાં એક બિલ્ડિંગમાં બિલાડીઓનું વર્તન બદલાઈ ગયું હતું. કુદરતી ઘટનાનો અણસાર મળી ગયો હોય તેમ ભાગવા લાગેલી બિલાડીઓ કેમેરામાં કેદ થઈ ગઈ હતી. શું પ્રાણીઓને આવી ઘટનાઓનો સંકેત અગાઉથી મળી જતો હશે તેની ચર્ચાઓ થઈ રહી છે. જાપાનના ઓસાકા પ્રાંતમાં તાજેતરમાં ૬.૧ની તીવ્રતાનો ભૂકંપ આવ્યો હતો. જેમાં મૃત્યુ પામેલા લોકો અને ઈજાગ્રસ્તોનો આંકડો ઘણો મોટો હતો, પરંતુ આ ભૂકંપ દરમિયાન એક નોંધનીય ઘટના બની હતી. જેમાં અહીંના વાકાયામા વિસ્તારમાં આવેલા ‘કેટ કાફે કેચી’ નામના બિલાડીઘરમાંની એક પણ બિલાડીને હાનિ પહોંચી ન હતી. વર્ષાેથી આપણે સાંભળતા આવ્યા છીએ કે, ભૂકંપ પહેલાં કેટલાંક પ્રાણીઓ વિચિત્ર વર્તન કરવા માંડે છે અથવા તો ભાગવા લાગતાં હોય છે. અલબત્ત, પ્રાણીઓને ભૂકંપ પહેલાં તેની આગોતરી જાણ થઈ જતી હોય છે કે કેમ તેનો હજુ સુધી કોઈ ઠોસ પુરાવો આપણને નથી મળ્યો. એક થિયરી એવી પણ છે કે પ્રાણીઓ ભૂકંપ દરમિયાન ઉદ્ભવતા ‘પી-વેવ્સ’ને મહેસૂસ કરી શકે છે, જે માણસો નથી કરી શકતા. આ સમગ્ર ઘટનાનો વીડિયો સામે આવ્યો છે, જેમાં ભૂકંપની સેકંડો પહેલાં અચાનક જ બિલાડીઓને અહીંતહીં ભાગતી જોઈ શકાય છે. કેટલીક બિલાડીઓને મોટેથી અવાજ કરતી પણ સાંભળી શકાય છે. આ ઘટનાની દસ જ સેકન્ડ બાદ ૬.૧ની તીવ્રતાના ભૂકંપનો જબરદસ્ત ઝટકો અનુભવાયો હતો.
——————————-.

ઓસ્ટ્રેલિયામાં મકાનના બગીચામાંથી ગોલ્ડ માઈન મળી!
ઓસ્ટ્રેલિયામાં રહેતા એક મકાનમાલિકને તેની આખી જિંદગીના સુખદ આશ્ચર્ય સમી ગોલ્ડ માઈન એટલે કે સોનાની ખાણ હાથ લાગી છે. નવાઈની વાત તો એ છે કે ગોલ્ડ માઈન મકાનની પાછળ આવેલા બગીચામાં હતી, છતાં મકાનમાલિકને તેનો અણસાર સુદ્ધાં આવ્યો ન હતો. એન્થોની ડુલીન નામના આ મહાશયને હજુ સુધી તેમની આંખો પર ભરોસો નથી બેસતો કે ખરેખર આવી કોઈ પ્રાચીન ગોલ્ડ માઈન હાથ લાગી છે. એન્થોનીએ બ્રિસ્બનમાં આવેલી ૧૬.૫ હેક્ટરમાં ફેલાયેલી આ પ્રોપર્ટી ત્રણ વર્ષ અગાઉ ૧૩.૫૦ લાખ ડૉલરમાં ખરીદી હતી. આ સ્થળે ભૂતકાળમાં આવી ઘણી માઈન્સ મોજૂદ હતી, પરંતુ વર્ષાે સુધી ટેકરીઓમાં આ માઈન્સ લોકોથી અજાણી રહી હતી. હોલિવૂડની ઇન્ડિયાના જોન્સ મૂવી સિરીઝમાં જોવા મળતાં માઈન્સનાં દૃશ્યો જેવો જ આ નજારો હતો તેમ આશ્ચર્યચકિત થઈ ગયેલા ડુલીને જણાવ્યું હતું. તેમણે ઉમેર્યું કે, હું જાણે ઇન્ડિયાના જોન્સના અન્ડરગ્રાઉન્ડ રેલરોડ્સનાં ફિલ્મી દૃશ્યો જોઈ રહ્યો હોઉં તેવો આ નજારો છે. સદી અગાઉ આ સ્થળે માઇનિંગનું કામ ધમધમતું હતું. છ મીટર ઊંડી આ માઈન આજે પણ તેની યથાવત્ સ્થિતિમાં છે. અલબત્ત, ગોલ્ડ માઈન મળી આવવા છતાં ડુલીને તેમાં આગળ શોધખોળ કરી કિંમતી સોનું મેળવવાના પ્રયાસ શરૃ નથી કર્યા તે પણ વધુ આશ્ચર્યજનક છે તેમ સ્થાનિકોનું માનવું છે.
——————————-.

 

Leave A Reply

Your email address will not be published.

Translate »